-
நிலநடுக்கம் காரணமாக மணிக்கூண்டு தகர்ந்து காணப்படும் பழைமையான தேவாலயம்.
பிலிப்பின்ஸ் மத்திய பகுதியில் செவ்வாய்க்கிழமை நேரிட்ட பலமான நிலநடுக்கத்தில் 85 பேர் உயிரிழந்தனர். காலை 8:12 மணிக்கு ஏற்பட்ட இந்த நிலநடுக்கம் ரிக்டர் அளவுகோலில் 7.2 புள்ளிகளாக பதிவானது.நிலநடுக்கத்தில் ஏராளமானோர் படுகாயமடைந்துள்ளதால் உயிரிழப்பு அதிகரிக்கலாம் என அஞ்சப்படுகிறது.
இந்த நிலநடுக்கத்தினால் மத்திய பிலிப்பின்ஸில் பல இடங்களில் அடுக்குமாடி கட்டடங்களும், வரலாற்று சிறப்புமிக்க தேவாலயங்களும் இடிந்தன. மக்கள் தங்களது வீடுகளை விட்டு வெளியேறி தெருக்களில் கூடினர்.
15 முதல் 20 வினாடிகள் இந்த நிலநடுக்கம் நீடித்தது. பல இடங்களில் சாலைகளில் பலத்த விரிசல் ஏற்பட்டது. பாலங்களும் இடிந்து விழுந்தன.
போகால் அருகே உள்ள மக்கள் தொகை நெருக்கம் மிகுந்த செபு நகரத்திலும் அதிக அளவில் சேதம் ஏற்பட்டது. மீன்பிடித் துறைமுகம் மற்றும் சந்தை பகுதியில் மேற்கூரை இடிந்து விழுந்ததில் பலர் உயிரிழந்தனர்.
போகாலில் 69 பேரும், செபுவில் 16 பேரும் உயிரிழந்தனர். இவர்களில் மூன்று பேர் செபு நகரத்தில் அரசு உதவித் தொகை பெறுவதற்காக நின்றபோது ஏற்பட்ட கூட்ட நெரிசலில் சிக்கி உயிரிழந்தாக தெரிவிக்கப்பட்டுள்ளது.
செபு நகரத்துக்கு அருகில் உள்ள மற்றொரு நகரத்தில் இந்த நிலநடுக்கத்தினால் கட்டடங்கள் இடிந்ததில் 18 க்கும் மேற்பட்டோர் காயமடைந்தனர் என்று போகால் மாகாண பேரிடர் மேலாண்மை அதிகாரிகள் தெரிவித்தனர்.
நிலநடுக்கம் ஏற்பட்ட பகுதியில் சிக்கி வெளிநாட்டு சுற்றுலா பயணிகள் யாரேனும் உயிரிழந்தார்களா என்பது குறித்த விவரங்கள் உடனடியாக தெரியவில்லை. செபு நகர மருத்துவமனையில் அனுமதிக்கப்பட்டிருந்தவர்கள் பாதுகாப்பு கருதி வெளியேற்றப்பட்டு மைதானத்தில் தங்க வைக்கப்பட்டிருந்ததாகவும், அந்த மருத்துவமனை கட்டடம் பாதுகாப்பாக இருப்பதாக உறுதி செய்யப்பட்ட பிறகு மீண்டும் அவர்கள் அங்கு கொண்டு செல்லப்பட்டதாகவும் அந்நகர மேயரின் உதவியாளர் தெரிவித்துள்ளார்.
நிலநடுக்கம் குறித்து பெண் ஒருவர் கூறியது:
நில நடுக்கம் ஏற்பட்டவுடன் அதிர்ச்சியில் தெருவிற்கு ஓடினேன். அங்கு காயமடைந்திருந்த பலரை கண்டேன். அப்போது, தங்களது தேவாலயம் இடிந்து விட்டதாக சிலர் தெரிவித்தனர். நிலநடுக்கத்தை தொடர்ந்து சுனாமி பேரழிவு ஏற்படுமோ என்ற அச்சத்தில் மக்கள் உள்ளனர் என்றார்.
பக்ரீத் பண்டிகையை முன்னிட்டு பள்ளிகளுக்கும் அலுவலகங்களுக்கும் தேசிய விடுமுறை அளிக்கப்பட்டிருந்ததால் அதிக அளவிலான உயிர்ச் சேதம் தவிர்க்கப்பட்டதாக தகவல்கள் தெரிவிக்கின்றன.
பசிபிக் கடல் பகுதியையொட்டி அமைந்துள்ள பிலிப்பின்ஸில் அடிக்கடி எரிமலை சீற்றங்களும், நிலநடுக்கமும் ஏற்பட்டு வருவது குறிப்பிடத்தக்கது.
கடந்த ஆண்டு மத்திய பிலிப்பின்ஸில் உள்ள நெகராஸ் தீவில் ஏற்பட்ட நிலநடுக்கத்தில் சுமார் 100 பேர் உயிரிழந்தது குறிப்பிடத்தக்கது.
No comments:
Post a Comment